ᗪíᗩ ᗪE ᖇOᔕᗩᒪíᗩ

O pasado 17 de xaneiro a Fundación Rosalía de Castro convocou a diversas entidades culturais e educativas relacionadas co Día de Rosalía para acordar as celebracións deste aniversario e, como resultado consensuado, acordouse mudar a data de celebración do día da poetisa galega ao 23 de febreiro . Este cambio prodúcese despois de que a investigadora galega Sagrario Abelleira revelase o pasado ano nova documentación que acredita a data de nacemento real nese día, dando a coñecer ademais datos inéditos sobre a vida da nosa autora máis recoñecida e da do seu home, Manuel Murguía.

Como o día está moi próximo, e seguro que todos andamos a darlle voltas a cabeza para deseñar actividades que estean á altura de tan ilustre persoeiro das nosas letras, compartimos material que nos achega a coordinadora de EDLG.

-Díptico do Día de Rosalía e unidades didácticas para Ed. Infantil e cada un dos ciclos de Ed. Primaria. Formato PDF (Arquivo adxunto)

-Unidades didácticas para Ed. Infantil e cada un dos ciclos de Ed. Primaria. Formato Calameo.
UD. Infantil: https://es.calameo.com/read/00670476639e85dc9afc7
UD 1º ciclo EP: https://es.calameo.com/read/006704766eb12b05c836e
UD 2º ciclo EP: https://es.calameo.com/read/006704766be13afdee92e
UD 3º ciclo EP: https://es.calameo.com/read/0067047662f0e4b46eb4c

-Rosalía de Castro. Biografía. Actividades intereactivas en formato Genially:
https://view.genial.ly/5ff75e8bc217200ce77cc6d5

-Que sabes de Rosalía de Castro? O rosco de Rosalía. Actividades interactivas en formato Genially:
https://view.genial.ly/61ef0aca2dd7bf001347b1be

Día de Rosalía 2020

Rosalía é unhas das mellores poetisas da nosa literatura, creadora de fermosos poemas como Cantarte hei, Galicia. Nesta ocasión, os nenos e nenas de 1º de primaria e infantil B quixeron contar coas familias para musicar e ilustrar este texto recollido na obra Cantares Gallegos.

Homenaxe a Rosalía

Este venres 28 quixemos adicar parte do noso tempo a unha das máis insignes figuras da nosa literatura, Rosalía de Castro. Nesta ocasión fixemos partícipes desta homenaxe a membros da nosa comunidade educativa, que aínda que parece que non, son parte fundamental da nosa escola.
Hoxe imos comezar dándolle as grazas a un dos nosos conductores, Alberto e a unha das coidadoras do autobús, Lola,que sen pensalo moito, accederon a axudarnos a contar a historía dunha nena que fixo rexurdir a nosa lingua e a nosa literatura coas súas verbas.

Día de Rosalía 2019

Semana intensa para recordar a figura de Rosalía de Castro cunha serie de actividades propostas dende a biblioteca do centro.

Empezamos coas propostas realizadas para conmemorar o nacemento de Rosalía de Castro o 24 de febreiro do ano 1837.
Este luns, Uxía, Diego, Rocío, Felipe, María e Sarai deleitáronnos coa lectura dun dos poemas máis coñecidos , ” Adiós ríos, adiós fontes”, pertencentes a obra de “Cantares Galegos”.

 

Seguimos con Rosalía. Ao longo da semana, empregando unha técnica pop art decoramos o retrato de Rosalía. Con todos eles crearemos o noso collaxe ao estilo mencionado.

 

Os festexos de Rosalía aínda non remataron! Durante esta semana a súa figura estivo presente na biblioteca, no timbre con interpretacións variadas dos seus poemas máis coñecidos e, como non, nas nosas aulas.

Rematamos co video realizado polos alumnos de 2º de EP e 5 anos de Educación Infantil sobre o poema de Rosalía de Castro pertencente a obra “En las orillas del Sar” publicada no 1884.

Rosalía Pequeniña

Rosalía de Castro, a dama das Letras Galegas, a muller que falou e escribiu en galego cando a nosa lingua era considerada a lingua dos “pobres e iñorantes”, foi unha nena coma todos vós. Soñaba con ser pirata, fada ou india; gozaba agatuñando ás polas das figueiras; escribía versos chamando pola alborada porque tiña medo da escuridade e soñaba con cambiar o mundo e axudar á xente pobre e desfavorecida.

A través da voz de Uxía podemos coñecer a esa Rosalía Pequeniña; coñecer os seus soños, as súas esperanzas e ilusións , os seus medos e a súa maneira de enfrentarse a eles a través da palabra escrita na lingua da súa aldea, da súa xente, da súa terra.

Esperamos que vos guste tanto coma a nós.

‘Rosalía pequeniña’ é o título libro-disco de Uxía na Editorial Galaxia (colección Sonárbore, 2013), ilustrado por Marina Seoane.